A mañá do venres, 4 de decembro, serviu para que máis de 400 alumnos e alumnas que cursan 5º e 6º de Educación Primaria en 9 centros educativos dos concellos de Ponteareas, Covelo, A Cañiza, Salvaterra de Miño e Mondariz participaran no Campionato Zonal Escolar de campo a través no Parque da Avisoureira, situado na parroquia ponteareá de Guláns.

O evento, organizado pola Agrupación Deportiva do Condado e A Paradanta (ADECONPAR) e enmarcada no programa Xogade promovido pola Secretaría Xeral para o Deporte, constou de 6 carreiras diferentes. Os alumnos de 5º de Educación Primaria fixeron un percorrido d 1 quilómetro de lonxitude, mentres que os de 6º percorreron un traxecto de 1,5 quilómetros.

Os 10 primeiros de cada categoría foron premiados con distintas medallas que lles foron entregadas de man do concelleiro de Deportes, Benito Márquez, e da edil de Ensino, Cristina Fernández. O Concello tamén colaborou aportando rosquillas para o alumnado. Ámbolos dous edís salientaron “a importancia de realizar campionatos que involucren a centros escolares de diferentes concellos, permitindo promover a práctica deportiva dunha maneira máis ampla”.