Un total de cinco persoas foron trasladadas a un centro hospitalario polos servizos sanitarios de urxencia tras resultar feridas nun accidente de tráfico que tivo lugar esta mañá na N-120, á altura da parroquia de Areas, no concello pontevedrés de Ponteareas. Unha das persoas que viaxaban nun dos turismos sinistrados tivo que ser excarcerada polos Bombeiros de Ponteareas, tras quedar atrapada por mor da colisión.

Os efectivos do parque comarcal, alertados polo 112 Galicia, tamén interviñeron na limpeza da vía. Foron varios os particulares que chamaron ao CAE 112 Galicia solicitando axuda ao fío das 10:00 horas de hoxe. Así, púxose en marcha un operativo no que participaron Urxencias Médicas, os axentes da Garda Civil de Tráfico e os efectivos de Protección Civil de Ponteareas.

Ferida a conductora dun turismo no Porriño

Por outra banda, unha media hora máis tarde, en O Porriño, a condutora dun turismo resultaba ferida nunha colisión contra un camión. Neste caso, a colisión produciuse na A-55, no punto quilométrico 14, cando circulaban en sentido Tui. Os Bombeiros de Porriño, alertados polo 112 Galicia, encargáronse da limpeza dunha vertedura de gasóleo derramada sobre a vía. Ademais, ao lugar do accidente acudiron os técnicos de Urxencias Médicas, os membros de Protección Civil de Porriño e os axentes de Tráfico.