O persoal do Centro de Atención ás Emerxencias (CAE) 112 Galicia xestionou dende as 06:00 da mañá de onte ata as 08:00 horas desta mañá un total de 381 incidencias provocadas pola meteoroloxía adversa. A maior parte das intervencións rexistráronse na provincia da Coruña, cun total de 203.

En Pontevedra xestionáronse 120, mentres que Lugo e Ourense apenas se viron afectadas con 32 e 25 incidencias respectivamente. A caída de árbores e pólas en estradas foi a incidencia máis repetida (86 incidencias), mentres que os anegamentos en estradas (54) e bolsas de auga en vías (36) tamén tiveron unha importante presenza. Así, a crecida dos ríos centrou boa parte das incidencias que o CAE 112 Galicia rexistrou nas últimas horas. Así, en Narón, os axentes da Policía Local confirmaron ao persoal do 112 Galicia que o Río Castro desbordara ata en dez puntos distintos do municipio. Isto motivou a chamada ao 112 de varios veciños que falaban de anegamentos en estradas locais e incluso dalgunha vivenda situada en San Martiño do Couto. Tamén, en Viveiro, as forzas da orde procederon a cortar a LU-161 debido ao aumento do caudal do Río Landro.

O Agra, entre os concellos de Portas e Caldas de Reis, creceu ata tal punto que os servizos de emerxencias de ambas as dúas localidades prohibiron a circulación en varias estradas municipais. Igualmente, en Valga, o desbordamento do río Louro obrigou a cortar á circulación varias pistas do concello e a pechar dous pasos subterráneos baixo a vía do tren. Pese a iso, confirmaron que ningún pobo estaba illado: os veciños dispoñían de vías de comunicación alternativas. Complicacións no tráfico tamén as houbo en Coristanco, concretamente, na DP-1911, as inundacións obrigaron a varios condutores a dar volta.

Nesta mesma situación víronse conductores na PO-510 en O Porriño, ou mesmo no casco urbán de Vigo, na rúa Nigrán. En Santa Comba, ao final da Rúa Outeiro, o condutor dunha camioneta precisou axuda para abandonar o vehículo posto que a auga alcanzaba a altura da fiestra. Outras vías resultaron anegadas, por exemplo, túnel de Juana de Vega e na circunvalación en dirección á Universidade, na Coruña, onde, ademais, houbo un desprendemento que provocou unha fochanca. O 112 Galicia xestionou, ademais, unha trintena de incidencias relacionadas con anegamentos en vivendas.

Así, recibíronse chamadas procedentes de Pontecaldelas, onde un particular aseguraba que a auga no interior da súa vivenda alcanzaba o medio metro de altura. Igualmente, nos concellos de Betanzos, A Coruña, Pontecaldelas, Cangas, Gondomar e Vigo varios particulares alertaron de situación similares nas súas vivendas. Por fortuna, non se rexistraron danos persoais provocados por mor das intensas chuvias.