O conselleiro de Cultura, Educación e Ordenación Universitaria, Román Rodríguez, visitou esta tarde o Pazo de Mos acompañado pola alcaldesa de Mos, Nidia Arévalo, a concelleira de Cultura mosense, Sara Cebreiro, o edil de Coordinación de Asociacións Veciñais, Patrimonio e Servizos, Camilo Augusto, o secretario xeral de Cultura, Anxo Lorenzo; e o delegado territorial da Xunta en Vigo, Ignacio López-Chaves.

O motivo da visita foi que a consellería de Cultura, Educación e Ordenación Universitaria, colaborará na dinamización e impulso de actividades culturais no Concello de Mos a través da Fundación Pazo de Mos. Así se reflicte no protocolo de colaboración asinado hoxe polo conselleiro Román Rodríguez e o presidente da Fundación Pazo de Mos, Manuel Barciela.

Dito documento de colaboración plasma o compromiso da administración autonómica de organizar, durante o presente ano 2016, actividades culturais no Pazo de Mos que, como é sabido, atópase ubicado no Camiño Portugués a Santiago de Compostela. As actividades poden incluír dende concertos, ata espectáculos infantís e/ou exposicións.

O obxectivo principal desta colaboración por parte da Xunta de Galicia coa Fundación é promocionar o Camiño de Santiago ó seu paso polo municipio mosense e darlle vida ó Pazo, unha das principais xoias do patrimonio histórico e arquitectónico da nosa localidade. Cómpre lembrar que o Concello de Mos xa realiza actividades varias nas instalacións do Pazo de Mos como iniciativas de todo tipo incluídas na programación municipal cultural anual, entre outras.

Segundo hoxe explicou o conselleiro de Cultura e Educación, neste protocolo establécese un marco xeral de colaboración que se deberá ir concretado ano a ano en actividades específicas.  Román Rodríguez salientou a importancia da cooperación entre institucións e administracións para levar a cabo iniciativas que redunden nun beneficio sobre os cidadáns, neste caso sobre os veciños e veciñas de Mos.

O conselleiro aproveitou para agradecer o traballo da Fundación Pazo de Mos a prol da difusión da nosa cultura e, así mesmo, loou o labor do Concello neste ámbito, con moitas das súas actividades neste Pazo a través da Fundación que o xestiona e que está integrada por representantes veciñais.

Ao abeiro deste protocolo, elaborarase un plan de actuacións culturais que se desenvolverán no Pazo de Mos. Para iso, a consellería de Cultura e Educación prestará o seu apoio no desenvolvemento de liñas de actuación e de realización de eventos culturais en Mos a través da Fundación Pazo de Mos. Deste xeito, o departamento educativo da Xunta colaborará na difusión pública das actividades culturais organizadas pola Fundación Pazo de Mos.

Pola súa banda, a Fundación Pazo de Mos comprométese a establecer unha programación de actividades que repercutan na promoción cultural e creativa de Mos e difundir e levar a cabo esa programación.

Este acordo enmárcase no apoio que a consellería lle vén ofrecendo a fundacións e asociacións para o desenvolvemento da súa actividade, entre as que destacan fundacións de autor como as de Rosalía de Castro, Otero Pedrayo, Eduardo Pondal e Vicente Risco; xunto con diversas entidades das catro provincias galegas, tamén de referencia no ámbito cultural.