Unha persoa foi liberada esta madrugada do interior do vehículo que conducía tras sufrir un accidente cando circulaba pola A-55, na estrada que une Puxeiros e O Porriño, á altura do concello de Mos. O particular que chamou ao CAE 112 Galicia ás 05:30 horas de hoxe para pedir axuda indicou que o coche quedou encaixado no gardarraíl da Autovía. Así, de contado, o persoal do CAE 112 Galicia alertou, ademais de Urxencias Médicas, aos bombeiros do Porriño que liberaron á persoa ferida.

A intervención da Garda Civil de Tráfico e dos membros do Servizo Municipal de Emerxencias de Mos tamén foi requirida polo CAE 112 Galicia.

Accidente en Tui

Por outra banda, pasados uns minutos das 19:00 horas da tarde de onte, o 112 Galicia recibiu a chamada de varios condutores que informaban da saída de vía dun turismo que circulaba pola A-55, no punto quilométrico 26, do concello de Tui. Segundo indicaron testemuñas que presenciaron o accidente, o turismo deu varias voltas de campá, o que motivou que outros tres vehículos mais resultasen implicados. Ademais, dúas persoas tiveron que ser atendidas polos técnicos sanitarios. O CAE 112 Galicia ademais de pasar aviso a Urxencias Médicas, tamén solicitou a colaboración da Garda Civil de Tráfico e dos efectivos de Protección Civil de Tui. Tamén, case á mesma hora, en Barbadás, un particular informou ao persoal do CAE 112 Galicia de area acumulada nunha extensión aproximada duns 100 metros en ambos os dous carrís da A-52, no punto quilométrico 232. Por iso, se pasou aviso á Garda Civil de Tráfico e aos membros do GES de Pereiro de Aguiar, que confirmaron o peche á circulación dun dos carrís mentres duraron as tarefas de limpeza da vía.