Un home perdeu a vida esta mañá ao precipitarse dende a terraza dun segundo piso a un patio de luces. A particular que informou do suceso apuntou que se tratara dunha caída accidental, aínda que, polo momento, descoñécense as causas. Unha vez coñecido o suceso, o persoal do 112 Galicia informou aos Bombeiros do Morrazo, posto que o lugar onde se atopaba o home era de difícil acceso. Ademais, púxose en coñecemento de Urxencias Médicas e dos axentes da Policía Local. O suceso tivo lugar ao fío das 10:30 horas desta mañá na rúa Cochón, na parroquia de Arcade, no concello pontevedrés de Soutomaior.