Un incendio nunha nave situada no lugar de O Torreiro, no termo municipal de Salceda de Caselas, mobilizou esta mañá aos bombeiros de Baixo Miño e Ponteareas. Afortunadamente, non houbo que lamentar danos persoais. Ás 5:30 horas desta madrugada, Urxencias Médicas indicaba ao persoal do CAE 112 Galicia que, enviaban unha ambulancia, por si fose precisa, para un incendio que ocorría no lugar de O Torreiro. De inmediato, o 112 Galicia alertou aos membros do parque comarcal de Baixo Miño e á Garda Civil. Ademais, solicitou a colaboración dos medios de extinción de Ponteareas e dos efectivos de Protección Civil de Mos, os que, aseguraron que se trataba de dúas naves unidas.

 

Sobre as 7:30 horas, os servizos de extinción comunicaron ao 112 Galicia que, o incendio estaba controlado, aínda que continuarían no lugar removendo e refrescando ata dar por rematada a extinción. Unha vez apagado na súa totalidade, os bombeiros confirmaron que unha das naves –dedicada ao empaquetado de angulas- ardeu por completo. Polo momento, descoñécense as causas que orixinaron o incendio. O persoal do Servizo de Medio Ambiente da Xunta de Galicia tamén foi informado do suceso polo 112 Galicia.