Persoal a bordo do helicóptero Pesca I do Servizo de Gardacostas de Galicia localizaron esta tarde a embarcación que levaba desaparecida dende a tarde de onte. Foi atopada, xunto a algúns restos da mesma, preto do illote de Boeiro, nas inmedicacións das Illas Cíes. Sen embargo, os dous tripulantes que ían a bordo continúan desaparecidos.

No operativo de busca, coordinado por Salvamento Marítimo, participan os helicópteros Helimer e Pesca I, embarcacións de Salvamento e do Servizo de Gardacostas de Galicia, así como embarcacións particulares. Ademais, esta tarde, sumáronse ao operativo voluntarios de Protección Civil de Vigo, segundo informaron ao CAE 112 Galicia, que peinan por terra a zona de Monteferro e colaboran na busca por mar con outra embarcación. A chamada que alertaba da desaparición da planeadora, de nome 'Látigo', con dous homes a bordo recibíaa Salvamento Marítimo ao fío das 20:00 horas de onte. Foi un familiar o que advertiu a ausencia da embarcación, que debería ter chegado ao peirao de Vigo a última hora da tarde de onte, logo de saír a faenar.