Dúas personas resultaron intoxicadas tras inhlar o fume procedente dun incendio que afectou a dous edificios situados na Rúa Michelena, en Pontevedra. Os ocupantes de ambos inmobles foron desaloxados polos axentes da Policía Local á espera de que interveiñesen os equipos de extinción. Á súa chegada, os Bombeiros de Pontevedra comprobaron que o lume era intenso e solicitaron máis recursos humanos e materiais para atallar as lapas.

Así, o persoal do CAE 112 Galicia pediu a colaboración dos Bombeiros do Morrazo e dos membros de Protección Civil de Pontevedra e Poio. Igualmente, alertaron aos efectivos dos parques de Ribadumia e Vilagarcía e mesmo se ofreceron os de Vigo. As lapas eran visibles dende diferentes puntos da cidade. Varios veciños se puxeron en contacto co 112 Galicia arredor das 20:40 horas de onte, o que permitiu que se activase o operativo de emerxencias.

Pasadas as catro horas desta madrugada, os membros de extinción de Pontevedra confirmaron ao 112 Galicia que o lume quedou sufocado e, ardeu na súa totalidade un dos edificios de dous andares e un baixo. As dúas persoas que resultaron afectadas por inhalación de fume, foron trasladadas ao Hospital de Montecelo polos servizos sanitarios de urxencia.