Unha sala calcinada de 30 metros de profundidade con armarios que gardaban baterías é o saldo deste incendio que se rexistrou sen danos persoais na Central Eléctrica de Frieira, en Crecente.

O 112 Galicia recibiu a alerta minutos antes da medianoite e unha hora e media despois os Bombeiros do Baixo Miño e Ponteareas tiñan xa o lume controlado. Pouco máis tardaron en sufocalo totalmente.

Ademais dos efectivos dos parques comarcal e municipal, a empresa xestora do encoro dispuxo un retén de emerxencias que colaboraron constantemente cos servizos de extinción. A modo preventivo, o persoal do 112 Galicia tamén informou ao GES de Ribadavia, pero bastaron os bombeiros do Porriño, Ponteareas e o retén da empresa para erradicar as lapas.