O director xeral de Orientación e Promoción Laboral, José Alfonso Marnotes González, visitou hoxe a Axencia de Colocación de Mos para coñecer de primeira man o Plan Integrado de Emprego, PIE Mos 3.0, acompañado pola alcaldesa Nidia Arévalo Gómez, e o concelleiro de Promoción Económica, Emprego e Novas Tecnoloxías, Óscar Soto Abadín. Marnotes puxo o Plan Integrado de Mos como un exemplo a seguir para outros municipios.

O Plan Integrado de Emprego Mos 3.0, que se atopa xusto no seu ecuador ó levar en marcha xa seis meses, forma parte da estratexia en política de emprego deseñada para a presente lexislatura e que se engloba baixo o título Mos Territorio de Oportunidades. Neste sentido Arévalo, rexedora local mosense, declaraba esta mañá que “o de Mos caracterízase por ser un Concello que dá prioridade ó emprego”.

Esta iniciativa conta co apoio económico da Xunta de Galicia que financia o Plan por medio dunha subvención de 281.506,97 euros.

Benefícianse desta acción un total de 90 usuarios/as do Plan Integrado de Emprego Mos 3.0. Entre estas 90 persoas hai 42 mulleres, 48 homes, 37 menores de 25 anos, 40 entre 25 e 40 anos e 12 maiores de 40 anos. En canto ós seus perfís por nivel de estudos 26 teñen estudos primarios, 28 Graduado en ESO, 29 ciclos formativos, 3 Bacharelato e 3 estudos universitarios.

Aproveitando a visita do director xeral fíxose balance dos resultados do PIE que, nos seus seis primeiros meses de traxectoria, logrou xa 29 insercións laborais entre os seus 90 usuarios/as. Ademais organizáronse e leváronse a cabo para eles un total de 21 accións formativas nas que participaron 83 dos 90 usuarios do Plan.

Existe unha importante colaboración empresarial con este proxecto, e se contactou coas empresas colaboradoras dos máis diversos sectores, para detectar os perfís profesionais que estas demandan,  ofrecendo así aos  usuarios do plan, actividades formativas adaptadas a estas necesidades  e realizando convenios de colaboración para realizar as prácticas profesionais coa posibilidade de futuras contratacións.

O Plan Integrado de Emprego Mos 3.0, que se prolongará ata finais de agosto deste ano, inclúe sesións de orientación laboral personalizadas con cada un dos usuarios do plan para valorar o seu perfil profesional, detectar as necesidades formativas de cada un deles e establecer un itinerario personalizado de inserción laboral.

As accións formativas transversais a realizar por todos os usuarios ata o remate do Plan son cursos de formación en competencias dixitais básicas para o emprego, curso de introdución ás relacións laborais, curso de inglés adaptado segundo niveis, e curso de redes sociais para a procura de emprego.

As accións formativas segundo cada perfil profesional que os alumnos e alumnas están a levar a cabo son: un curso atención ao público con nocións de paquetería e escaparatismo, un curso preparatorio para a ESO, un curso preparatorio para a obtención do carné de conducir B, un curso carretilleiro, un curso de acompañante de autobús escolar, un de inglés, outro de controlador de accesos, outro de manipulador de alimentos e un curso sobre alerxias alimentarias.

No segundo semestre do PIE impartiranse novos cursos tales como: carretilleiro, certificado de profesionalidade de operacións básicas de cociña, camareiro, limpeza, operario de almacén, técnicas de venta, programas informáticos para administrativos, atención ao cliente e televenta, prevención de riscos laborais, reparación de pantallas de dispositivos móviles, caixeiro repoñedor, competencias dixitais e inglés intermedio.

Selo de excelencia

A Axencia de Colocación de Mos certifica ás empresas colaboradoras do PIE cun selo de calidade empresarial que acredita o seu compromiso social coa creación de emprego.

Este selo vai dirixido ás entidades que colaboren, de maneira voluntaria e sen contraprestación, no Plan Integrado de Emprego PIE Mos 3.0 que o Concello de Mos está a desenvolver.

“O Concello de Mos”, declaraba o edil Óscar Soto esta mañá, “quere valorar o apoio á creación de emprego de calidade e quere, ademais, que estas entidades poidan dar visibilidade do seu compromiso coa mellora social”.

As entidades poderán optar a diferentes versións do selo, segundo o tempo e os recursos dedicados a favorecer a integración no mercado de traballo das 90 persoas desempregadas que están a ser beneficiarias do PIE ‘Mos 3.0’. Polo que se diferenciará entre aquelas entidades que faciliten prácticas, as que realicen contratos laborais e as que se comprometan a manter os devanditos contratos no longo prazo.

Desde o inicio da súa participación no PIE Mos 3.0, as entidades poden exhibir o selo na súa páxina web e medios publicitarios, nos seus produtos, locais e documentos, para comunicar o seu exemplar comportamento como entidade socialmente responsable en materia de emprego.

As acreditacións e galardóns finais serán entregadas nun acto público a cada unha das entidades colaboradoras,  unha vez concluído o Plan Integrado de Emprego PIE Mos 3.0.

Dentro dos obxectivos que se están desenvolvendo dentro do Plan Integrado de Emprego ‘Mos 3.0’ está o fomento do emprendemento, como forma de autoemprego. Para iso, está a apostarse pola formación e a mentorización, que consigan motivar e impulsar a creación de entidades polas persoas beneficiarias do PIE Mos 3.0. Estas entidades, tamén terán a súa propia categoría de selo como entidade emerxente ao amparo do PIE Mos 3.0, para que poidan facer uso do mesmo nos seus documentos, materiais, redes sociais, etc.