A concellería mosense de Educación e Participación Cidadá que dirixe a edil Kely Monzón organiza un obradoiro de automaquillaxe no que participan 12 persoas, e que contribuirá á mellora da autoestima e motivación dos/as participantes, a aprender a sacarse o maior partido para sentirse mellor consigo mesmos/as, e a que moitos deles, incluso máis aló dun uso persoal, descubran un interese para seguir formándose nesta materia de cara á unha  saída profesional.

O obxectivo do curso é conseguir que cada participante sexa capaz de realizar un bo deseño de cellas segundo o seu óvalo, coñecer correctamente os produtos, realizar tres tipos de maquillaxe (día, noite e cocktail) adaptándoo á súa morfoloxía e necesidades e aprender a utilizar os utensilios necesarios para a realización dun bo automaquillaxe.

Este curso práctico, impártese dende o 18 de febreiro ó 17 de marzo, todos os xoves (concretamente os días 18 e 25 de febreiro; e os días 3, 10  e 17 de marzo) das 19:00 horas ás 22:00 horas, cun custe total do curso por participante de 15 euros.

As actividades das que consta os obradoiro lévanse a cabo no Multiusos das Pozas de Mos, situado na parroquia de Petelos.