O concello do Porriño está obrigado a pechar  xa o campo de tiro ao prato que dende hai dezasete anos funciona "de xeito ilegal no monte de Atios".  A sentenza 232/2015 ditada polo xulgado do Contencioso Administrativo número 2 de Pontevedra, que "anulaba a licenza de actividade e obra provisional outorgada polo goberno de Nelson Santos á Sociedade de Tiro Rosa Porriño La Venatoria", xa é firme.

Os veciños de Atios sinalan nun comuncado que "esa sentenza fora recorrida en apelación ante o TSXG en contra da promesa que a propia alcaldesa Eva García de la Torre lle fixera aos veciños". Agora, nunha decisión "que a comunidade de montes de Atios aplaude", o goberno local decidiu retirar o recurso e, deste xeito, a sentenza que anula a actividade é firme a todos os efectos.

Confirmado o martes día 2 de marzo o desestimento do recurso por parte do Concello ante o TSXG, o goberno local ten a obriga de instar ao peche do campo de tiro sen máis dilación. De non ser así, a comunidade actuará en consecuencia ante os órganso xudiciais e administrativos correspondentes para denunciar ao responsable de que non sexa acatado o mandato xudicial.  

A comunidade de montes non desbota tampouco demandar xudicialmente aos responsables de manter unha actividade aberta durante 17 anos sen ningún tipo de cobertura legal. Asimesmo esixirá a reparación do dano ambiental  causado nos montes comunais polo vertido ilegal de toneladas de residuos (cerámicas, vaíñas plásticas e chumbo) derivados do tiro ao prato. Demandará unha compensacion pola afección ao cultivo forestal situado na área de impacto da actividade. E estará moi vixilante contra calquera intento de dar cobertura legal a unha actividade ilegalizable, por moito que sexa do interese particular dalgúns funcionarios municipais ou de persoas relacionadas co concello do Porriño.

A comunidade de montes de Atios lamenta que "tivera que ser un tribunal, a instancia da denuncia dos veciños, o que certificara a ilegalidade deste campo de tiro. Unha ilegalidade coñecida polo concello do Porriño, a policía local, a garda civil e a policía autonómica, algúns de cuxos membros eran usuarios do campo de tiro, pero que nunca actuaron para esixir o cumprimento da lei" aseguran nun comunicado feito público esta semana.