O Partido Popular de Salceda de Caselas denuncia a situación que están a padecer moitos empresarios e autónomos que ven como pasan os días e seguen sen cobrar as facturas por traballos feitos. “Cónstanos que hai provedores que levan máis dun ano e dous meses á espera de que se lle faga o abono correspondente”, explica Santiago Rodríguez Davila, presidente e concelleiro do Partido Popular.

Todas esas facturas pendentes de pago suman, a día de hoxe, máis dun millón de euros. “E o peor é que o alcalde, como non ten xustificación algunha, bótalle a culpa á oposición, cando a única culpa que temos é fiscalizar o labor do goberno sendo sempre construtivos e velando polo ben do pobo, á vez que clarexar e dar a coñecer a todos os veciños a situación real na que nos atopamos. E esa situación real é, precisamente, que a causa deste retraso nos pagos é debida á inexistencia de partida e liquidez, porque o goberno confeccionou un orzamento irreal e inflado, onde os ingresos previstos non se cumpriron, sendo eles mesmos conscientes de que non se cumprirían, e, consecuentemente, os gastos planificados non poden ser pagados”.

“Exemplo deste desfase e descontrol son os 850.000 euros que prevían ingresar en concepto de IBI, cando en realidade só se chegou aos 716.000 euros e os 200.000 euros polos postos da praza de abastos e os 40.000 euros por abrir zanjas que finalmente quedaron a cero, non ingresando ningún so euro deses 240.000 previstos” aseguran. “E todo elo sabendo de antemán, pola cantidade recadada noutros exercicios e polo coñecemento real da situación actual, que esas cifras de ingresos nunca se cumprirían, importándolles unicamente contratar obras e proxectos para anuncialos en época preelectoral. Se a iso lle engadimos que eran conscientes tamén que realmente non había cartos para pagarlle a esas empresas e autónomos aos que contrataban para facer obras e servizos, o asunto é dobremente grave”.

“É o goberno o único responsable de que os provedores estean sen cobrar, por contratar o que sabían que non podían pagar e por falsear as contas, actuando dun xeito irresponsable, imprudente e, totalmente, insensato”, subliña Rodríguez Davila.