Onte presentouse en Santiago de Compostela unha formación específica dirixida a profesionais dos eidos social e educativo, que lles aportará coñecementos sobre diversidade sexual e pautas básicas de acompañamento ás mozas e mozos en situación de transexualidade, así como ás súas familias.

No acto, Isabel Taboada, do grupo Fiadeiras destacou que as educadoras e educadores sociais se atopan nunha posición privilexiada para reducir posibles situacións problemáticas derivadas da condición de transexualidade. Así mesmo, explicou que a transexualidade é unha expresión máis da diversidade dos sexos, e non unha patoloxía.

Pola súa parte, Cristina Palacios, presidenta de Arelas, afirma que “desde ARELAS sempre transmitimos a necesidade de que as e os profesionais do ámbito social, educativo, médico e legal deben formarse en diversidade sexual, porque son quen teñen que dar os apoios precisos ante as distintas etapas e circunstancias do colectivo trans*. É por iso que todos os axentes sociais deben traballar para fomentar a sensibilización, naturalización e educación sobre a Diversidade Humana e todos os resultados singulares que o sexo produce, só así poderemos crear una cidadanía que entenda e respecte á Diferenza como a única forma de convivencia social.”

A formación en cuestión comezou onte, e desenvolverase durante as próximas semanas.