O concelleiro de Promoción Económica e Emprego, Óscar Soto, informou hoxe de que 10 usuarios/as do Plan Integrado de Emprego Mos 3.0 estanse a formar nun Curso de “Operacións Básicas de Cociña” que comezou o pasado día 07 de marzo e rematará o vindeiro día 08 de abril.

A duración total do curso é de 125 horas, das cuais 30 horas corresponden a prácticas en empresas coas que o Concello de Mos asinará un convenio de colaboración.

O itinerario formativo que se está a impartir componse das seguintes unidades formativas: normas e condicións hixiénico-sanitarias en restauración, preelaboración e conservación culinarias, realización de elaboracións básicas e elementais de cociña e asistir na elaboración culinaria, elaboracións de pratos combinados e aperitivos, e por último realización dun módulo de prácticas profesionais non laborais de 30 horas de duración.

Este curso é impartido polo persoal do Colexio Lar e realízase nas súas instalacións.

A finalidade do curso é a mellora da ocupabilidade dos/as usuarios/as e a inserción laboral das 10 persoas que están a formarse na ocupación de “Axudante de Cociña”, tal e como informaba o propio edil Óscar Soto.