Mellorar o proceso de identificación das mostras das análises clínicas e evitar aos pacientes as molestias de gardar cola cando acoden ao seu Centro de Saúde a realizalos. É o obxectivo da aplicación informática que xa se comezou a utilizar nos centros de Asistencia Primaria e que se ampliará a todos os que dependen da área que abarca a EOXI de Vigo.

A informatización das salas de extraccións dos centros de saúde  cun módulo específico  do sistema de información dos laboratorios do Complexo permite dar un paso mais na seguridade coa identificación e rexistro informático das mostras,por parte do persoal de enfermería, no momento da extracción de cada paciente. É un sistema que consta dunha ferramenta informática, un dispensador de etiquetas e unha pantalla táctil situados nos postos de extraccións de Enfermería.

Ata agora, o paciente que acudía a facerse análises clínicas ao seu centro de saúde debía esperar a que un administrativo emitise as etiquetas identificativas das mostras que traía consigo e das que ían identificar posteriormente á extracción. Desa forma, cada persoa debía agardar a obter primeiro as súas etiquetas e volver a esperar a que fose a súa quenda para entrar na sala de extraccións. Coa implantación do sistema evítase a primeira espera.

 O usuario acude ó centro de saúde á hora aproximada da cita e se dirixe a sala de extraccións onde  unha auxiliar de enfermería é a encargada de recoller as mostras que achega o paciente e de identificalas segundo o protocolo existente. A continuación será a enfermeira que realice a obtención das mostras a que, tras comprobar que o paciente está nas condicións necesarias e pedirlle que se identifique, seguindo o Protocolo de Identificación Inequívoca da EOXI ,emita as etiquetas con só un toque na pantalla táctil.

Sete centros de saúde

A aplicación informática funciona xa en sete Centros de Saúde de Vigo: Pintor Colmeiro, Nicolás Peña ,Navia, Bolivia,  Rosalía de Castro-Beiramar, que é o que conta cun maior número de tarxetas sanitarias da EOXI de Vigo, Teis e Chapela.

A implantación iniciouse no centro de Pintor Colmeiro cun período de pilotaxe de dúas semanas, no que un equipo formado por dous informáticos, un facultativo de laboratorio e a subdirectora de enfermería, mantiveron unha xuntanza informativa inicial con tódolos profesionais do centro, posteriormente unha sesión formativa pra os profesionais de enfermería para, o día seguinte, iniciar a axenda de extraccións coa ferramenta informática.
Neste período de pilotaxe recolléronse tódalas diferentes situacións que se poden presentar para ter prevista a súa solución nos seguintes centros da implantación. Contouse coa boa disposición do persoal do centro en todo momento.

Formación

O manexo da aplicación é sinxelo, pero require que os profesionais de Enfermería e auxiliares estean familiarizados co seu uso. “Para iso levamos a cabo unha fase de formación en cada Centro de Saúde unha vez que o sistema se instala”, aclara Ana Estévez, subdirectora de Procesos de Enfermería sen ingreso e responsable da implantación do sistema.

A formación comeza cunha reunión de todo o persoal do Centro de Saúde do que se trate. Unha sesión que ten unha duración aproximada dunha hora. Nunha segunda fase, realízase formación específica para o persoal de Enfermería que traballa no equipo de análises clínicas do centro de Atención Primaria e ao terminar entrégaselle a cada profesional unha clave coa que se identificará no sistema e que permitirá a trazabilidade das mostras.
A terceira fase da formación consiste no uso práctico da propia aplicación. “Nese momento, e durante tres días comézase a traballar cunha lista reducida de pacientes. Unha vez testado o funcionamento do sistema e cando o persoal xa está perfectamente familiarizado co seu uso, ábrese a lista normal, que oscila duns centros a outros pero pode chegar a 120 pacientes atendidos no día.

A informatización das salas de extraccións de Atención Primaria foi financiada con fondos Feder da Unión Europea.

Ana Estévez resume que “de forma moi sinxela mellorará a fase preanalítica das mostras, tanto das aportadas polo paciente como as recollidas na sala de  extraccións; se facilitará  a trazabilidade e, indirectamente  suporá unha maior comodidade para o paciente, que non terá que facer  dúas esperas. Tamén é de destacar a comprensión dos usuarios no primeiro día da implantación en  cada centro, asumindo con paciencia pequenas demoras, polo aprendizaxe do persoal.