O voceiro do PP de Salceda de Caselas, Santiago Rodríguez Davila, celebra a construción do novo centro de saúde por parte da Xunta e a celeridade coa que vai facer realidade, 10 meses despois de que o Concello presentara uns documentos que lle levaron case 9 anos preparar como son a reparcelación e o informe de impacto ambiental.

Uns requisitos sen os que non se podería asinar este convenio e que o Concello estivo negando durante anos, o que provocou o retraso das obras.

“O alcalde de Salceda de Caselas é o único responsable de que este centro de saúde non se puidera comezar antes”, sinala o voceiro popular. En 2009, cando aínda gobernaba o bipartito na Xunta de Galicia,  o alcalde recoñecía nun boletín do BNG de Salceda de Caselas, con data febreiro de 2009, que era necesario o proxecto de reparcelación dos terreos. Dicía textualmente “atópase na súa fase final, coa redacción do proxecto de reparcelación”, pero unha vez que en 2011 o presidente da Xunta, Alberto Núñez Feijoo se comprometeu publicamente á construción do centro de saúde, entón negouse a presentar esta reparcelación e incluso chegou a dicir que non era necesaria.

Nesta liña, o voceiro popular explica que o alcalde de Salceda tardou 8 anos en aprobar esta reparcelación cando sabía perfectamente, como sabemos todos, que era necesaria aprobala para poder construír sobre os terreos que están dentro do Peri da U2 da Devesa.

O alcalde de Salceda segue sen  aceptar o reto de debater en público co voceiro do PP sobre a cesión dos terreos do centro de saúde “porque saba que se expón a quedar en evidencia ante as verdades que demostran os documentos”

“A forma de actuar normal de un alcalde normal, sería axilizar ao máximo todos os trámites necesarios para poñer a disposición da Xunta os terreos, pero no caso do alcalde de Salceda foi o contrario, cando xa había o compromiso firme da Xunta entón recuou e fixo o máximo posible, pero para impedir que este centro de saúde se contruíse.

É un verdadeiro especialista da mentira e responsabilizar aos demais da súa propia parálise. Pero agora quedou definitivamente demostrado que se a Xunta de Galicia non cumpriu antes coa palabra dada foi porque o alcalde puxo todas as trabas posibles para que non se construíse o centro de saúde.

Cabe recordar que o o voceiro retou en máis de unha ocasión ao alcalde a debater en público, no auditorio ou na praza do concello, sobre a tramitación da cesión dos terreos e o motivo polo que a Xunta de Galicia non puido asinar e recepcionar ata o de agora os terreos para a construción do centro de saúde, pero o alcalde nunca chegou a aceptar este reto, “porque sabía que se exponía a quedar en evidencia ante as verdades que demostran os documentos, o reto sigue en vigor, se non o acepta definitivamente, será que ten algo que esconder”, explica Rodríguez Davila.