A secretaria xeral de Ordenación do Territorio e Urbanismo, Encarnación Rivas, mantivo hoxe unha reunión de traballo coa alcaldesa de Mos, Nidia Arévalo, para analizar o estado actual da tramitación do PXOM, que foi achegado polo concello para a súa aprobación definitiva o pasado 19 de xaneiro.

Encarnación Rivas trasladoulle á rexedora municipal que agora a Xunta dispón dun prazo dun mes para comprobar a integridade documental do expediente administrativo e do proxecto presentado. Tamén lle indicou que a Administración galega terá tres meses para estudar o PXOM, período que empeza a contar unha vez que este completo.

Cómpre destacar que o Plan xeral foi aprobado provisionalmente o pasado  30 de decembro de 2015 e porá fin ás Normas Subsidiarias de Planeamento vixentes dende outubro de 1992.

A Xunta de Galicia destaca o apoio técnico e económico deste documento que planificará o desenvolvemento do concello nos vindeiros 12 anos, para o cal concedeu axudas por importe de 200.000 euros.