A Presidenta da Deputación, Carmela Silva, recolleu hoxe o testemuño da campaña do día mundial da concienciación do autismo, declarado polas Nacións Unidas,  que se celebra o día dous de abril.

O presidente da asociación BATA, Fausto García,  fixo entrega deste testemuño á Presidenta da Deputación tras a concentración, levada a cabo diante do Pazo Provincial, no que participaron membros da corporación provincial e dos funcionarios.

O lema deste ano, tal e como recordou Carmela Silva,  é “Inclusión, Tolerancia e Respecto”  polo que a Deputación asume  ser “unha Deputación inclusive, tolerante e respectuosa coas diferencias, porque todos e todas somos diferentes e todos e todas temos o dereito a igualdade de oportunidades”.

A Presidenta da Deputación quixo tamén ter un recoñecemento para a asociación BATA que traballa cos nenos e nenas con autismo e subliñou que as administracións deben ter en conta esta situación e poñer os recursos necesarios para que estas persoas teñan os mesmos dereitos que o resto de pontevedreses e pontevedresas.   
Pola súa banda, Fausto García, agradeceu a Carmela Silva a dispoñibilidade da Deputación de Pontevedra para sumarse ao día mundial do autismo e o seu apoio constante para as iniciativas da entidade social.