521 alumnos e alumnas do IES de Mos asisten hoxe á obra teatral Smoke City, promovida conxuntamente entre as concellerías de Cultura e Política Social e Educación e Participación Cidadá para evitar o consumo de tabaco na adolescencia. A actividade ten lugar hoxe no auditorio do Multiusos das Pozas durante dúas sesións, unha para o alumnado da ESO e outra para o alumnado de Bacharelato. Cada sesión ten unha duración dunha hora.

Esta obra de teatro desenvólvese en Smoke City, o paraíso do fume, sobre todo do fume dos cigarros. As mafias do tabaco dominan a cidade, dirixidas polo seu capo, o pérfido Silvio Nicotini. É unha historia de acción, unha aventura urbana de gansters e policías, un cómic teatral do xénero negro, negro como o aire de Smoke City, negro como os plans de Silvio Nicotini, e negro como os pulmóns das súas pobre vítimas.

Smoke City aborda unha problemática moi de actualidade como é a do tabaquismo, poñendo énfase nas consecuencias pero tamén nos beneficios de levar unha existencia limpa, sen dependencias, que permitan realizar un monte de actividades libres de ataduras físicas e psíquicas, que, ao fin e ao cabo, é todo o contrario de vivir atrapado, atado, encadeado a un pitillo, como é o desexo do malvado Silvio Nicotini. O espectáculo realízao a compañía Malasombra.

A concelleira mosense de Política Social e Cultura, Sara Cebreiro, acompañou ós alumnos espectadores do pase matinal e explicou os obxectivos desta actividade, que non son outros que “promover os hábitos saudables a través da realización de actividades culturais alternativas, ofertar actividades de ocio alternativas e de balde para a xuventude mosense, motivar ós xoves para un mellor uso do seu tempo de lecer, evitar o estilo de ocio actual baseado no consumo de alcohol, tabaco e outras sustancias nocivas para a saúde e o correcto desenrolo persoal, promover a calidade de vida da xente nova, fomentar o hábito da cultura a través deste tipo de actuacións teatrais, previr directamente nos hábitos do tabaquismo e promover o cambio naquelas persoas que xa están inmersas no mundo do fume”.