O Concello do Porriño, en colaboración  cos centros de Educación Secundaria IES Pino Manso, IES Ribeira do Louro e CPI Ribeira, organiza, dende o vindeiro 18 de abril e ata o 8 de xuño, un ciclo de 42 charlas, obradoiros e cursos formativos  dentro da I Edición do Programa “Xuventude en Valores 2016’, dirixido a 942 rapazas e rapaces.

Os obxectivos destas iniciativas son: formar ao alumnado en valores, actitudes e habilidades sociais que axuden a reducir a aparición de futuras condutas de risco, exactamente coñecer  qué tipo de valores son os que sustentan e acompañan as condutas saudables.

Eliminar ideas negativas, estereotipos, prexuízos acerca doutras razas, culturas ou da homofobia de xeito que as alumnas e alumnos de Secundaria coñezan que na nosa sociedade actual, coexisten valores e contravalores, así como modelos de comportamento social.

En base a iso os programas e obradoiros serán os seguintes: ‘Non sexas bocachancla’, sobre comportamento nas Redes Sociais; ‘O meu corpo é meu’, sexualidade responsábel; ‘Drogas, tabaco e alcohol, cómo montamos a festa sen desmontarnos a vida’; ‘A dinámica da risa’; ‘Racismo’, tomando coma punto de partida a música e o  cine, coa proxección da película ‘Crash’ e, en base a ela, un debate; ‘Igualdade’.

No desenvolvemento deste programa, ten especial importancia xerar reflexión e debate de forma participativa co alumnado.