A viceportavoz de Alternativa Ciudadana de Ponteareas, ACiP, Raquel Bautista Alfaya, vén de denunciar o que cualifica de “lamentable estado de abandono e caos no mantemento” de instalacións e mobiliario urbano en Ponteareas froito da “ineficacia dun Goberno que, en lugar de cumprir co seu cometido, limítase a botarlle as culpas ao anterior executivo”, engade Bautista Alfaya.

Para a viceportavoz de ACiP, os dez meses transcorridos dende as eleccións, “son tempo dabondo para asumir a responsabilidade de gobernar” e o único que ven os veciños e veciñas, explica Raquel Bautista, “é un casco urbano abandonado e cunha pésima imaxe”.

A concelleira independente enumera unha serie de deficiencias “que están a vista de todos” como son os bancos rotos dende hai meses; baldosas levantadas nas prazas públicas “que orixinan caídas diarias dos veciños e veciñas”; vías intransitables por culpa da maleza e de falta de limpeza; excrementos de cans que levan semanas sen ser recollidos ou parques infantís levantados e que non se reparan. Todo isto, en conxunto, afirma Raquel Bautista, “ofrece unha vergoñenta imaxe de abandono e deterioro”.

Xa non valen mais desculpas de falta de persoal cando aos catro ventos venderon na prensa a contratación de mais de 34 persoas e mais cando o goberno esta contratando obras de reparación con empresas externas cando eran traballos realizados polo persoal do Concello o que leva un gasto engadido e innecesario

Bautista lembra que os veciños e veciñas “seguen a pagar os seus impostos” e merecen que os servizos municipais estean á altura que se espera dunha vila da importancia de Ponteareas.

Asemella, asegura a edil de ACiP, que o único que lle preocupou ao Goberno “foi o reparto de salarios incrementando a cantidade para os concelleiros e concelleiras, pero sen preocuparse do realmente importante como é a planificación e a xestión de goberno”.

A viceportavoz de ACiP esixe á concelleira de Vías e Obras, María Jesús Garrote, e ao alcalde que “poñan fin a esta situación de abandono do noso Concello” e lémbranlle ao alcalde “que é o máximo responsable da situación que se está a dar e que, as liortas entre os socios de goberno, non teñen porque pagalas os veciños”, remata Raquel Bautista.