O presidente local do PP de Mos, Camilo Augusto e a alcaldesa popular Nidia Arévalo informaron hoxe da “nova etapa que está a iniciar o grupo municipal popular”. Na súa sede de Petelos estanse a acometer melloras materiais “de cara a abrir as súas portas ó público tres días á semana, concretamente os luns, mércores e venres” explican.

Augusto explicou que os luns e venres a sede abrirá en horario matinal de 09.00 horas a 13.00 horas e os mércores en horario de tarde, de 16.00 horas a 20.00 horas.

Unha vez rematadas as melloras na sede local e abertas as súas portas novamente ó público, realizarase unha campaña de afiliación. Camilo Augusto declarou a este respecto que “aínda que o PP de Mos conta cun groso número de afiliados, rexistrouse últimamente a demanda entre os simpatizantes de abrir un novo período para realizar novas afiliacións”.

Outra novidade na que se está a traballar dende o Partido Popular mosense é “na creación dunha páxina web máis funcional e atractiva acorde cos novos tempos que corren, na que todos os usuarios da mesma poidan contar cun espazo de consulta e participación” explica Arévalo, engadindo que “ó tempo que se moderniza a web do partido, outro obxectivo será dinamizarse tamén nas redes sociais partindo do xa existente perfil de Facebook de Populares de Mos, que servirá de base a esta campaña de enfatización e presencia nas redes sociais”.

"Todo este labor que se está a desenvolver e que continuará o longo dos vindeiros meses conta co apoio complementario e indispensable das persoas que conforman a directiva local do PP de Mos, así como de novas incorporacións humanas que decidiron sumarse a este proxecto" sinalan dende o partido.

Augusto comentaba así mesmo que “dende o Partido Popular de Mos cremos que o labor de partido debe extenderse moito máis aló da sede, por iso trataremos tamén de ser máis activos na organización de eventos sociais e culturais de interese xeral nos que poidan participar afiliados e simpatizantes”. Esta nova etapa surxe despois das derradeiras eleccións municipais celebradas en maio do ano pasado, para poñer en marcha o engranaxe de funcionamento do partido no ámbito local e para quentar motores de cara ás vindeiras citas electorais.