A concelleira de Cultura mosense, Sara Cebreiro, informa de que as actividades que están programadas para conmemorar o Día Internacional do Libro son talleres de teatro e contacontos nos centros educativos, un espectáculo enmarcado no programa Ocio en Familia e varias iniciativas a desenvolver na Biblioteca Municipal.

Respecto das actividades nos centros educativos do municipio, o 19 de abril realizouse unha actuación de monicreques no Multiusos das Pozas dirixida ós alumnos/as de Educación Infantil dos colexios de Petelos, Pena de Francia, Mestre Martínez Alonso e Atín.

Os días 30 e 31 de abril o Contacontos, Contos do Mundo, percorrerá os CEIPs de Petelos, Pena de Francia, Mestre Valverde Maio, Mestre Martínez Alonso e Atín facendo as delicias dos cativos de 1º e 2º cursos de Primaria.

Xa o domingo 24 de abril chegará a actividade de Ocio en Familia, O Zampalibros, musical infantil didáctico dirixido a familias que se celebrará no Multiusos ás 18:00 horas.

E, pola súa banda, a Biblioteca Municipal de Mos acolle dende o 18 de abril e ata hoxe un troco de libros usados para todos os seus usuarios, sorteo dun lote de libros entre tódolos socios que fagan uso do préstamo ó longo do día de hoxe, así como visitas escolares ás súas instalacións que tamén se realizaron durante a presente xornada e o obradoiro As Letras na Gaiola cos membros de Asodifisi, Asociación de Diminuídos Físicos e Psíquicos de Mos, que será hoxe en horario de tarde de 17.00 horas a 19.00 horas.

As edil Sara Cebreiro declarou sobre estas iniciativas que “o  obxectivo principal é o fomento da lectura entre as persoas de tódalas idades, así como tamén inculcar nos máis cativos a convicción de que os libros poden ser unha fonte de diversión, imaxinación e sabedoría”.