Os servizos sanitarios de urxencia trasladaron esta mañá a unha muller que resultou ferida ao verse implicada nunha colisión entre tres vehículos. O accidente tivo lugar na A-55, dirección Vigo.  Ao fío das 11:00 horas de hoxe, foi a mesma implicada quen solicitou asistencia sanitaria ao CAE 112 Galicia. Indicou que se atopaba mareada. Así, de contado, se pasou aviso a Urxencias Médicas, á Garda Civil de Tráfico e aos efectivos do Servizo Municipal de Emerxencias de Mos. Os Bombeiros de Baixo Miño e o servizo de mantemento da estrada tamén foron informados polo persoal do 112 Galicia.

Case á mesma hora, o CAE 112 Galicia tivo constancia doutra colisión múltiple, tamén, na A-55, á altura da localidade de O Porriño, aínda que neste caso, afortunadamente, non houbo que lamentar danos persoais. Persoal dunha ambulancia que circulaba, nese intre, a escasos metros da saída 15 desta estrada, dirección Vigo, foi quen informou ao CAE 112 Galicia do accidente. Asegurou que non había feridos pero que se estaba producindo moita retención debido á colisión de tres vehículos.  Dende o 112 Galicia, ao igual que no caso anterior,  se solicitou a intervención dos axentes de Tráfico e do persoal do servizo de mantemento da estrada.