A Presidenta da Deputación de Pontevedra, Carmela Silva, asegura sentirse “profundamente orgullosa” do equipo feminino do Poio Club de Fútbol polo traballo desenvolvido ao longo do presente ano e a súa presenza na élite do fútbol sala nacional.

Silva firmou esta semana co presidente do Poio Club de Fútbol, Juan José García Camiño,  o convenio de colaboración polo que a Deputación aporta a cantidade de 25.000 euros a este equipo para a promoción do deporte. A esta firma acudiu tamén o alcalde de Poio Luciano Sobral e a deputada delegada de Deportes Chelo Besada, que tamén é concelleira do equipo de goberno do concello.

Juan José García mostrouse satisfeito pola firma de este convenio, que cualificou como fundamental para o equipo e sinalou que esperan rematar a tempada  da liga de fútbol sala no medio da táboa de clasificación.
O alcalde de Poio Luciano Sobral mostrouse agradecido polo apoio da Deputación de Pontevedra ao equipo de fútbol feminino que é “un orgullo para unha localidade de 17.000 habitantes ter un equipo na primeira liña do fútbol sala nacional”.

Pola súa banda, a Presidenta da Deputación de Pontevedra, Carmela Silva, reiterou que era unha “satisfacción” rubricar convenios como este por ser para un “equipo feminino que está na élite do fútbol sala nacional e que ademais é o único equipo representante de toda a provincia”.

A Presidenta recoñeceu o labor do concello, polo apoio que ven prestando a este club, a todo o equipo directivo que fai posibles os seus éxitos pero, sobre todo, as rapazas que co seu traballo “teñen conseguido estar no medio da clasificación da liga nacional. Algo que parece sinxelo pero que é moi importante”.

Silva subliñou tamén o esforzo que supón para as integrantes do equipo “que en moitas ocasións teñen que aproveitar os seus desprazamentos pola xeografía nacional para levar os seus apuntes e estudar para sacar adiante os seus estudos”.

Por último, a Presidenta destacou que as Administracións teñen a obriga de apoiar a equipos como o Poio Club de Fútbol polo que supón a integración da muller nesta disciplina deportiva e por ser o único  da provincia de Pontevedra na primeira liga  nacional de fútbol sala.