Realizado por José Gil sobre un argumento de Rafael López del Haro e estreado no ano 1916, trátase do primeiro filme galego de ficción, que chegou ata os nosos días grazas aos materiais conservados polo Museo de Pontevedra e restaurados polo Centro Galego de Artes da Imaxe (CGAI). A película reflicte espazos coma o Gran Balneario da Toxa e as ribeiras do Lérez para recrear as peripecias de Miss Ledya, sobriña do multimillonario Míster Kazton, na súa viaxe á nosa terra.

Na obra tamén participou Castelao, considerado como a figura máis importante da cultura galega do século XX e a quen se lle dedicou este ano o Día das Artes Galegas, feito que motivou que a Deputación de Pontevedra nomease o 2016 como Ano Castelao.

A Concellería de Cultura conmemora así estes dous fitos de xeito simultáneo. O Ano Castelao, polo que houbo e haberá máis actividades, e os 100 anos da estrea da película Miss Ledya de José Gil, quen non só foi un fotógrafo e director pioneiro no cinema galego senón que ademais, era natural de Rubiós (As Neves).

A primeira proxección foi o venres 29 de abril ás 20:00 h. As seguintes faranse o domingo 8 de maio ás 16:00h e o sábado 14 de maio ás 12:30h.