O concelleiro de deportes de Mos, Alberto Méndez, informou hoxe da celebración esta fin de semana da II Liga de Xadrez Interescolar Mos organizada polo Club de Xadrez Mos e que terá lugar no Centro Dotacional do Medio Rural de Torroso.

O torneo levarase a cabo mañá sábado 30  de abril e o domingo día 1 de maio e trátase dunha liga entre todos os colexios de Mos. Cada centro forma un ou varios equipos de nenos e nenas. O obxectivo do torneo non é outro que dar continuidade ao proxecto de difusión do xadrez levado a cabo polo Club Xadrez Mos no Concello de Mos, e levar o xadrez a todas as parroquias e centros educativos mosenses.

O sábado a fase de clasificación comezará ás 16.15 horas e rematará ás 19.50 horas e o domingo a fase final será de 16.30 horas a 20.45 horas, momento no que se realizará a clausura e entrega de premios.

Na primeira edición desta Liga Interescolar celebrada o ano pasado non participaron todos os Centros de Educación Infantil e Primaria do Concello, pero este ano sí e a competición conta coa participación dos 5 colexios públicos do Concello, do Instituto e do Colexio Lar. Contando polo tanto cun total de sete centros participantes nesta ocasión.

En total hai 57 rapaces e rapazas dos sete centros educativos incritos na Liga Interescolar que dará comezo mañá sábado e rematará o domingo. Brais Otero Nogueira do Club de Xadrez Mos será o director do torneo.

O evento desenvolverase da seguinte maneira: 11 equipos distribuídos en 2 grupos, de tal xeito que os 2 grupos xogan o sábado unha fase de clasificación, e o domingo fórmanse 2 novos grupos; un cos vencedores do sábado, e outro cos perdedores. Neses grupos do domingo dispútase o título do torneo.

Beneficios do xadrez

Respecto do xadrez o edil Alberto Méndez falou dos seus beneficios específicos a nivel educativo que son:  que permite o desenvolvemento de calquera das competencias educativas básicas, destacando a competencia matemática, promove unha gran cantidade de práctica na resolución de problemas, ofrece castigo e recompensa inmediatos na resolución de problemas, aumenta o grado de concentración e memoria, e favorece o adestramento en atención, favorece o desenvolvemento e organización do pensamento: analizar, interpretar, sintetizar, valorar, aplicar, razoar, etc.; desenvolve a intelixencia emocional e os valores persoais, e crea patróns e sistemas de pensamento que soen conducir ao éxito cando se usan con consistencia.

Os estudantes que xogan ao xadrez se acostuman a procura de diferentes alternativas, o que resulta en mellor puntuacións en fluidez e orixinalidade. A competencia estimula o interese e promove a alerta mental, reta aos estudantes e favorece o sentimento de logro. Un medio de aprendizaxe organizado a través dos xogos ten un efecto positivo na actitude dos estudantes sobre a aprendizaxe. Esta dimensión afectiva actúa como facilitador dos logros cognitivos.