O S.N. de CCOO e UGT-Galicia fan un chamamento á cidadanía galega a participar nas manifestacións convocadas para este Primeiro de Maio baixo o lema “Contra a pobreza salarial e social. Traballo e dereitos”.

Ambos sindicatos convocaron manifestacións na Coruña, Ferrol, Santiago, Viveiro, Lugo, Ourense, Vilagarcía de Arousa, Pontevedra e Vigo. Nesta última participaron os secretarios xerais, José Antonio Gómez Gómez (UGT-Galicia) e Xosé Manuel Sánchez Aguión (S.N. de CCOO de Galicia).

CCOO e UGT esixen unha nova política que sitúe en primeira liña a recuperación do emprego estable e dos dereitos económicos e laborais arrebatados. Cómpre unha distribución máis xusta da riqueza xerada entre salarios e beneficios para alcanzar un verdadeiro modelo social e democrático.

A sociedade española que sae da recesión é máis inxusta e en Galicia a degradación social e laboral tamén resulta evidente. 164.000 persoas perderon o seu emprego nestes últimos seis anos e as que o conservan sofren cada vez máis a precariedade. Todo isto sumado a un sistema de protección por desemprego que cobre cada vez a menos persoas. Isto conduce a situacións extremas para moitas familias.

Por todo isto, UGT e CCOO insiste en que a denuncia da cidadanía é máis necesaria que nunca, polo que chaman á participación nas manifestacións convocadas para este Primeiro de Maio en Galicia