A Xunta de Goberno da Deputación de Pontevedra vén de adxudicar a Formagal Formación e Servicios S.L. o contrato, mediante procedemento aberto, para a xestión, desenvolvemento e execución do programa “Conectadas 2016”, posto en marcha polo servizo de Igualdade da institución provincial.

Formagal ofertou un prezo de 295.264,20 € para desenvolver 332 accións formativas que estarán vertebradas arredor dos oito bloques temáticos de “Conectadas 2016”: muller emprende, muller e cultura, actualízate, coas túas mans, porque ti o fas, súmate ó cambio, ponte en forma e coidados persoais.

O programa está destinado a asociacións sen ánimo de lucro que teñan como obxectivo a promoción das mulleres, que apoien o seu desenvolvemento e actuación, o empoderamento das mulleres, e impulsen o seu tecido asociativo, para a consecución da igualdade entre mulleres e homes.

“Conectadas 2016” ten como obxectivo potenciar a participación e promoción das mulleres e favorecer as relacións interpersoais en igualdade así como o intercambio de experiencias, impulsando accións formativas e incorporando de maneira transversal os principios de igualdade, corresponsabilidade e conciliación nos distintos ámbitos persoal, laboral e familiar. Amais, tamén pretende contribuír a mellorar a empregabilidade das mulleres e o seu mantemento no mercado de traballo reducindo a brecha dixital mediante o emprego da información e as novas tecnoloxías.