O luns reuniuse por primeira vez a Comisión de Estudo do transporte municipal que ten como obxectivo a elaboración dunha memoria para valorar o establecemento do devandito servizo público. Dita memoria deberá constar de varios documentos tales coma: o regulamento polo que se rexirá o servizo, unha valoración dos aspectos xurídicos da contratación e establecemento do tipo de xestión do servizo; e un estudo económico de costes.

Unha vez finalizada, esta memoria deberá de ser aprobada polo Pleno da Corporación Municipal e ser sometida a información pública durante o prazo dun mes; prazo tras o cal aprobarase definitivamente.

A memoria constitúe o procedemento previo para poder establecer o servizo público de transporte municipal. Tras a aprobación da mesma xa se poderá iniciar o procedemento de contratación da empresa concesionaria.

É dicir, que este é o paso previo para sacar a licitación a concesión, e que tódalas empresas que estean interesadas en optar a xestionar o transporte municipal mosense poidan presentar as súas ofertas culminando coa contratación dunha delas como concesionaria e poñendo en marcha, a continuación, o devandito servizo de transporte; que dende a administración local estímase que será de cara ao vindeiro verán.

A xuntanza celebrada onte pola mañá no salón de sesión do Concello foi a de constitución da Comisión de Estudo e a primeira de sucesivas reunións da mesma, que será convocada todas as veces que sexa necesaria para levar a cabo e rematar canto antes os traballos necesarios de cara a completar a memoria.

Na reunión estiveron presentes a alcaldesa de Mos, Nidia Arévalo, a concelleira de Medio Ambiente, Urbanismo e delegada de Mobilidade, Julia Loureiro, a secretaria e o interventor municipais, así coma a enxeñeira e a aparelladora do Concello de Mos.

A Comisión de Estudo que onte se constituiu viña de aprobarse en Pleno na sesión ordinaria que se celebrou o pasado 25 de abril.

Previamente celebrárase unha reunión o día 1 de abril en Santiago entre a alcaldesa de Mos, Nidia Arévalo, a concelleira de Urbanismo e Medio Ambiente mosense, Julia Loureiro, e os xurídico e secretaria municipais coa conselleira de Infraestruturas e Vivenda da Xunta de Galicia, Ethel Vázquez, e a directora xeral de Mobilidade, Helena de Lucas de Santos, para ultimar os trámites previos á posta en marcha do Plan Municipal de Transporte.

Durante a xuntanza abordáronse as alternativas posibles tratando de buscar a máis óptima para que o Plan Municipal de Transporte fora unha realidade canto antes e o inicio do seu funcionamento se demorase o menos posible no tempo. Deste xeito técnicos e representantes políticos de ambas administracións, local e autonómica, constituíron unha mesa de traballo para deseñar a estratexia máis eficaz e rápida para poñer en marcha canto antes o transporte municipal.

Detalles do servizo de transporte municipal

O proxecto de transporte municipal presentado polo Concello de Mos consiste nun sistema de buses lanzadeira distrubuídos en dúas liñas que comuniquen as dez parroquias mosenses entre sí e coas paradas do Transporte Metropolitano sitas en Puxeiros, Peinador, Tameiga, Sanguiñeda e San Cosme en Cela; o que lles permitirá ós veciños e veciñas de calquera punto da localidade mosense desprazarse no transporte público en igualdade de condicións. Ademais este servizo comunicará cos principais puntos de interese e afluencia veciñal do municipio que son o Centro de Saúde do Rebullón, o Instituto nas Pozas e o Pavillón Óscar Pereiro nas Pozas tamén.

“Este plan correspóndese ó proxecto de transporte municipal que o Partido Popular de Mos presentou como parte do seu programa electoral nos pasados comicios locais”, segundo declaraba a rexedora mosense.

Sobre este Plan de Transporte Municipal Arévalo explicou que constará dun autobús lanzadeira de liña circular que comunicará as 10 parroquias mosenses entre sí e cos puntos de enlace co Transporte Metropolitano, para poder desplazarse ata calquera dos municipios da área.

Ademais de comunicar as 10 parroquias entre sí esta liña comunica a tódalas parroquias mosenses coas zonas de intercambio co Transporte Metropolitano que une Mos coas demais localidades da Área Metropolitana.

Neste sentido, Arévalo destacou a importancia deste plan que conectará as parroquias sen servizo coas paradas do Transporte Metropolitano, garantindo deste xeito a mobilidade de todas as parroquias tanto entre elas como con outros concellos metropolitanos.