Técnicos da Xunta de Galicia reuníronse no Concello de Mos coa alcaldesa, Nidia Arévalo, e o edil de Vías e Obras, Luis Alonso, para concretar sobre o plano as características e trazado da senda peonil que se acometerá na estrada autonómica PO-331 que vai do Porriño a Gondomar.

Os técnicos da Xunta informaron ós representantes municipais dalgúns dos detalles da senda, quedando outros pendentes de concretar. A groso modo a actuación incluirá a construcción de beirarrúas na marxe da estrada que carece delas, mellora das beirarrúas e pasos de peóns existentes; e do cruce de acceso ao Colexio de Atín mediante a acometida dunha intersección.

Tratarase dunha senda segura, sustentable e integrada na paisaxe incluída no novo Plan de Sendas de Galicia. Consiste nun itinerario peonil na zona de Atín, parroquia de Cela.

A senda pasará polos Concellos de Porriño e Mos e contará cun investimento de 260.000 euros subvencionado pola consellería de Infraestruturas e Vivenda. Dará continuidade ás aceras existentes na estrada, pola súa marxe esquerda, (situado nas proximidades do Colexio Santo Tomás na localidade do Porriño) ata a intersección existente coa estrada a Pereiras – Tameiga (no municipio de Mos). A poucos metros desta intersección atópase o Colexio de Educación Infantil e Primaria de Atín, polo que coa execución da senda existirá un itinerario peonil continuo polas dúas marxes da estrada, que comunicará os dous centros de ensino co termo municipal do Porriño.

Neste tramo de estrada, ademais dos centros escolares mencionados, existe un número significativo de vivendas nas marxes, cuxos habitantes veranse tamén beneficiados por esta actuación.

O propósito fundamental desta senda é promover itinerarios peonís útiles e saudables, ao percorrer a distancia entre os núcleos urbanos e os centros de equipamentos e servizos como son as escolas anteriormente mencionadas.

Está previsto que os traballos de acometida desta senda comecen antes do remate do próximo verán para que os veciños/as mosenses e porriñeses habitantes da zona da estrada que vai a Gondomar poidan ter, canto antes, unha senda integrada na paisaxe para realizar os seus itinerarios habituais.

Esta senda suporá beneficios para as persoas, ao velar pola súa seguridade e tratar de fomentar hábitos máis saudables; beneficios para ambas vilas implicadas: O Porriño e Mos, significando menor conxestión de vehículos e novos espazos de tránsito peonil; e beneficios para o medio natural, garantindo menos contaminación acústica e mellora da calidade do aire, ao reducir a emisión de gas.

A senda contará cun deseño que conxuga identidade, seguridade, durabilidade e integración paisaxística. Os elementos presentes na citada infraestrutura viaria son o pavimento integrado, bordo con sinalización, separador verde e a gabia de seguridade.

Esta iniciativa enmárcase no Plan autonómico de Seguridade Viaria 2016-2020. As sendas do Plan de Sendas de Galicia construiranse nas marxes das estradas de titularidade autonómica coa fin de incrementar a seguridade daqueles usuarios máis vulnerables, como son os peóns e os ciclistas.

O Plan elaborouse partindo dunha análise global e atendendo a factores como: a situación dos núcleos de poboación, os servizos e os equipamentos, o tráfico e a sinistralidade que rexistra cada treito da estrada, a orografía e as pendentes do terreo, o clima, a facilidade de implantación, e a posibilidade de conectar con percorridos xa existentes. O Goberno galego realizou unha análise integral do territorio para o seu desenvolvemento por fases, priorizando as comarcas nas que actuar dacordo con criterios de poboación, tráfico, sinistralidade, orografía e clima; e entre os municipios prioritarios na provincia de Pontevedra atópase o de Mos.