O salón de sesións do Concello de Mos acolleu unha mesa de traballo a tres bandas entre a administración local, a Confederación Hidrográfica Miño-Sil e o Consorcio de Augas do Louro.

Por parte do Concello estiveron presentes a alcaldesa mosense, Nidia Arévalo, o concelleiro de Patrimonio e Servizos, Camilo Augusto, e técnicos municipais. Tamén asistiron técnicos da Confederación Hidrográfica e por parte do Consorcio de Augas do Louro acudiu o seu xerente.

A mesa de traballo tiña o obxectivo de optimizar a coordinación entre os tres entes para mellorar o servizo ao cidadán. Deste xeito, segundo declararon os representantes municipais, Arévalo e Augusto, “tratamos de coordinar a tramitación de permisos e licenzas que require o Concello por parte da Confederación para a realización de obras de saneamento e traballos doutra índole que afecten ou pasen por instalacións con titularidade da Confederación Hidrográfica; coa finalidade de tentar axilizar ditos trámites minimizando o tempo de duración dos mesmos”. Deste xeito o que se pretende é dar axilidade á consecución de obras tanto municipais como promovidas por particulares.

A iniciativa de organizar reunións periódicas coma esta surxiu porque se detectou dende o Concello que os trámites e permisos non estaban a ser todo o rápidos que deberían, e para buscar unha solución a esta demora decidiuse convocar unha xuntanza na que buscar solución á mesma, xa que a administración local mosense é bastante dependente da Confederación Hidrográfica do Miño-Sil e o funcionamento desta inflúe notablemente nos procedementos de autorización de obras a realizar por parte do Concello e de particulares.

Así, con estas mesas de traballo nas que as tres entidades entran en comunicación directa, espéranse poder axilizar ó máximo as xestións en beneficio tanto da administración local mosense como da súa comunidade de máis de 15.000 veciños e veciñas.

Na xuntanza celebrada quedou patente así mesmo a boa sintonía, afán de colaboración e vontade de mellora dos representantes dos tres organismos presentes: Concello, Confederación e Consorcio do Louro.