Ao longo destas dúas semanas, os alumnos de quinto e sexto de Educación Primaria do CEIP de Atios, Antonio Palacios e Santo Tomás, vivirán unha experiencia única grazas á visita do poeta, dramaturgo, director, artista plástico e educador, David Fernández Rivera (Vigo, 1986). Concretamente para compartir un novo taller apoiado na poesía visual, referímonos ao “Proxecto Caligrama 2000”. Unha dinámica que leva en vigor desde o 2008 e que ata a data percorreu diferentes institucións educativas tanto nacionais como internacionais. Esta actividade está organizada pola Concellería de Educación de Porriño, que dirixe Lourdes Moure.

O éxito desta dinámica débese fundamentalmente ao traballo dos nenos, que a través das direccións de Rivera, aprenden a explorar, interpretar e crear poesía visual. O máis sorprendente do traballo é que non se apoia nun material adaptado á infancia; todo o contrario, os infantes adéntranse nas entrañas, aparentemente complexas, de grandes clásicos como Joan Brossa ou Apollinarie, ademais da obra visual do propio David.

Outro dos puntos relevantes do “Proxecto Caligrama 2000” é o seu carácter interdisciplinar, e é que partindo sempre desde a imaxinación e creatividade, os alumnos mergúllanse desde unha perspectiva crítica cara valores tan importantes como o respecto á vida, animais, natureza, identidade persoal, etc... Así mesmo, o taller incide no debate sobre temas como a escravitude no século XXI, o consumismo, a rutina, a importancia da arte..., ademais de moitas outras cuestións propostas polos colexiais desde a efervescencia que lles dá o obter unha nova perspectiva.

E dicimos isto porque, se hai algo que cambia no alumno despois da visita de David Fernández Rivera, é a súa percepción da arte. En dúas horas, a expectativa aburrida e axiomática cara á tradición, descomponse no sorriso da liberdade e do aperturismo poético. De feito, o “Proxecto Caligrama 2000” busca o fomento do interese pola lectura, a arte en xeral e a formación dos consumidores culturais do futuro.

O “Proxecto Caligrama 2000” non só é un proxecto educativo, senón tamén unha reivinicación para reflexionar sobre o rol dos máis pequenos dentro do panorama cultural. O próximo curso David tratará de seguir impulsando esta proposta, xunto con outros talleres ou xornadas co obxectivo de continuar compartindo diversas perspectivas da poesía.

A Universidade del Valle de Colombia (Univalle), concretamente a súa Sede de Tuluá, presentou e estudou a poesía visual, escénica e fonética de David, xunto ás súas aplicacións educativas, a través de talleres como o “Proxecto Caligrama 2000”. Deste xeito, o poeta dá un paso máis na internacionalización da súa pedagoxía e compromiso educativo desde as artes.