As veciñas e veciños de Areas, Arnoso e Xinzo, están traballando xuntos baixo a Plataforma N120 para acadar un obxectivo común, que non é outro que darlle solución a unha problemática coa que diariamente se enfrontan as veciñas e os veciños ao empregar esta importante estrada de competencia estatal, e que vertebra a comunicación tanto a pé coma en vehículos dende estas tres parroquias ata o centro urbano de Ponteareas.

Nestas últimas semanas a dirección da Plataforma N120 tense reunido cos diferentes grupos políticos con representación no Concello de Ponteareas, e nestas reunións analizáronse as múltiples deficiencias e perigos aos que as veciñas se enfrontan diariamente.

Quedou claro o malestar veciñal coas distintas administracións públicas, que son as responsables deste grave problema que afecta a unha poboación de case 3.000 persoas dende fai máis de 20 anos.

A N120 presenta, dende o punto de vista da veciñanza presenta graves deficiencias, tales coma o escaso alumeado, a inexistencia de beirarrúas e pasos habilitados para poder cruzar con seguridade, ou as deficiencias nos accesos das estradas municipais coa N120.

"A día de hoxe a parroquia de Arnoso non dispón dun acceso seguro e os cruces de Areas presentan erros técnicos, que impiden un cruzamento seguro" explican.

Despois das reunións cos grupos políticos, o seguinte paso foi a presentación dun escrito ante a Subdelegación do Goberno de Pontevedra solicitando unha reunión urxente para tratar o problema.

Os acontecementos sucedidos nos últimos meses nesta estrada esgotaron a paciencia da veciñanza, que está disposta a chegar a onde faga falta para solucionar este problema. Non están dispostos a que suceda un novo atropelo ou unha nova morte.