Dous turismos colidiron frontalmente esta mañá na PO-552, nas Roteas, en Vigo. O impacto provocou lesións a catro persoas, que, non obstante, foron trasladadas conscientes ao hospital de referencia. Ademais, os bombeiros da cidade tiveron que liberar ao ocupante dun dos vehículos implicados, que quedou atrapado tras o golpe.

Pasadas as 10:30 horas de hoxe, un particular pediu axuda ao persoal do 112 Galicia. A partir de aí, os xestores organizaron un operativo no que, á parte dos efectivos do parque municipal de bombeiros, participaron os técnicos de Urxencias Médicas, os axentes da Garda Civil de Tráfico e voluntarios de Protección Civil. Tamén foi informado un equipo da Axencia Galega de Infraestruturas (AXI) para restablecer a seguridade na vía.