Un día como hoxe, fai xa 66 anos, Robert Schumann, ministro francés de Asuntos Exteriores, pronunciaba un discurso para impulsar a cooperación política entre as nacións de Europa que se converteu no xerme do que hoxe coñecemos como Unión Europea. Foi tal a transcendencia da declaración de Schumann que se escolleu o día de hoxe, 9 de maio, para celebrar e conmemorar o Día de Europa.

Europa vive na actualidade unha das maiores crises humanitarias do noso tempo, en niveis nunca vistos desde a II Guerra Mundial. Millóns de persoas refuxiadas, máis da metade sirias e sirios, están a chegar a Europa fuxindo da guerra en condicións infrahumanas e deixando atrás os seus fogares, os seus seres queridos, o seu traballo, o seu país, todo o que tiñan na súa terra,na procura de seguridade e dun futuro mellor.

Persoas cuxo único delito é loitar pola liberdade, pertencer a un determinado grupo social ou ter unha opción política ou relixiosa diferente á que por obrigación se está a impoñer.

Persoas que poñen en perigo ata as súas propias vidas para atopar en Europa esperanzas, paz e solidariedade e, no seu camiño, atópanse cun muro que non responde ás súas perspectivas; cunha Europa cuxos principais valores estanse a esvaecer; cunha Europa que incumpre os convenios internacionais de dereitos humanos; cunha Europa que esquece o dereito internacional de asilo e atención ás persoas refuxiadas.

Desde a Deputación de Pontevedra non queremos permanecer alleos a esta realidade. Tampouco ao sufrimento de milleiros de persoas que debido a crise, tamén aquí neste país, convertéronse en vítimas inocentes dun sistema brutalmente inxusto onde o desemprego, a pobreza, a perda de valores,o individualismo ou a xenofobia, que criamos ter superado, teñen agora que volver a ser desterrados.

Por iso conmemorar o Día de Europa é hoxe máis necesario que nunca. Porque a Europa que estamos a vivir non é a que queremos. Porque precisamos volver á orixe de Europa e reivindicar, enxalzar e poñer en valor os principios cos que naceu, asentados na paz, os seus valores e o benestar dos pobos; na igualdade, liberdade e democracia; na solidariedade, cooperación e a xustiza; na tolerancia e non discriminación;no pluralismo,proxecto común e unidade e, por riba de todo, na defensa dos dereitos humanos, especialmente os dereitos das nenas e dos nenos, e o respecto á dignidade humana.

Valores e principios, todos eles, recollidos no propio tratado da Unión Europea así como en leis, declaracións, pactos internacionais que durante décadas se veñen formulando para promover e protexer os dereitos humanos, e que hoxe parece que estamos a esquecer.  Por iso precisamos, máis que nunca, loitar e reivindicar o compromiso e a implicación de todos os axentes políticos e sociais para preservar a paz e a seguridade internacional; para salvagardar os dereitos das persoas, os principios dos que tanto, ata o momento, presumimos na Unión Europea.

Agardo que coa conferencia “Cara onde camiña a Unión Europea?” de Celso Cancela, profesor doutor de Ciencia Política e da Administración da Universidade de Vigo e Titular da Cátedra JeanMonnet “Understandingthe U.E. in the 21st century”;  co debate “Como ves a Unión Europea: visións diversas”, no que participará alumnado da Universidade de Vigo procedente de Italia, Brasil, Rumanía, Francia e España; e co intercambio de experiencias para divulgar vínculos existentes entre a Deputación de Pontevedra e Europa, poidamos afondar sobre estas e outras moitas cuestións sen perder de vista que a Europa que estamos a vivir non se corresponde coa Europa coa que estamos comprometidos.

Estou segura de que neste día, e a través destas xornadas,todas e todos imos reflexionar para romper as barreiras que hoxe Europa está a construír. Temos o deber e a obriga de manter vivo o espírito do nacemento da Unión Europa e loitar para recuperalo e converter ó noso continente na Europa dos valores; na Europa dos dereitos humanos; na Europa da cidadanía; na Europa que todas e todos queremos.