A Unidade Operativa de Drones da Axencia Galega de Emerxencias (AXEGA) supervisa as instalacións de Fandicosta para comprobar o estado actual da nave, despois do incendio iniciado na tarde de onte no Concello pontevedrés de Moaña. Aínda que, a situación está controlada, os servizos de emerxencia continuarán traballando arreo ata lograr a súa completa extinción.

A  Xunta de Galicia desactivou esta mañá o Plan de Emerxencias de Galicia (Platerga), no seu nivel 1,  e, o Plan de Contaminación Marina de Galicia (Camgal) en fase de alerta que, dende onte permanecían activados ante a posibilidade de producirse algunha fuga dos materiais cos que se traballaba na nave. Por prevención, decidiuse suspender as clases ao longo da xornada de hoxe nun centro escolar próximo, o CEIP Domaio. Os bombeiros do Morrazo indicaron ao CAE 112 Galicia que o lume está controlado, quedando algún pequeno foco interior. Ademais, os datos obtidos coa unidade móbil de calidade de aire, situada en Cesantes, mostran concentracións baixas de contaminantes.