A Presidenta da Deputación de Pontevedra, Carmela Silva, acompañada dos deputados provinciais David Regades e Xosé Leal, dos alcaldes da Illa de Arousa, Carlos Iglesias, e Caldas de Reis, José Manuel Rey, do tenente de alcalde de Nigrán, das concelleiras de cultura de Bueu e Vilagarcía de Arousa, do concelleiro de cultura de Redondela e dos responsables dos eventos músico-culturais que integran a iniciativa da institución provincial, presentou esta mañá a campaña “Festivais Rías Baixas, sete citas que non deberás perder”, a través da cal se promoverán Cultura Quente (24 e 25 de xuño, Caldas de Reis), Atlantic Fest (1 a 3 de xullo, A Illa de Arousa), PortAmérica (15 e 16 de xullo, Nigrán), SinSal Son Estrella Galicia (22 a 24 de xullo, Redondela), SonRías (4 a 6 de agosto, Bueu), O Marisquiño  (12 a 14 de agosto, Vigo) e Revenidas (19 a 21 de agosto, Vilagarcía de Arousa). Esta actuación, enmarcada nos eixos de promoción levados a cabo pola institución a través de Turismo Rías Baixas, ten por obxectivo impulsar unha imaxe innovadora, moderna, diferente, vangardista e auténtica da provincia de Pontevedra.