O xefe territorial de Pontevedra da consellería de Economía, Emprego e Industria, Ignacio Rial, a alcaldesa de Mos, Nidia Arévalo, a concelleira de Urbanismo mosense, Julia Loureiro, e o arquitecto e xurídico municipais reuníronse esta semana no salón de sesións do Concello con representantes de AEMOS, Asociación de Empresarios, e de varias empresas do Polígono do Rebullón para tratar de buscar unha solución ás deficiencias existentes no mesmo.

Previamente a esta xuntanza, o arquitecto municipal viña de realizar un informe valorado das necesidades do polígono que se centran fundamentalmente na canalización e xestión de augas pluviais e fecais e mellora do vial central, incluíndo a maiores a acometida dunha rede de hidrantes para a extinción de incendios e o soterramento do tendido eléctrico.

A mellora do vial central debería contemplar todo tipo de traballos de humanización como mellora do firme, acometida de beirrarúas e aparcadoiros, delimitación de vados, optimización do alumeado público, etc.
O custe de todos estes traballos podería superar os 480.000 euros sen incluír os labores de soterramento do cableado eléctrico, tratándose, polo tanto, dun proxecto moi ambicioso para o que se está a buscar o xeito máis idóneo de abordalo.

Entre as posibilidades que se trataron na reunión  plantexouse a idea de mancomunar a conexión ós servizos e asumir o custe entre todos os empresarios asentados no Polígono do Rebullón, a posibilidade de que a consellería conceda unha axuda ó Concello e, á súa vez, a administración local asine un convenio coas empresas do Polígono; ou que a consellería de Economía e Industria asinase co Concello de Mos un convenio a dous anos para poder acometer esta ambiciosa obra.

As prioridades nesta área industrial son, en primeiro lugar, a canalización e xestión de pluviais e fecais xa que hai un muro con perigo de derrumbe por este motivo e, en segundo lugar, o proxecto de ordenación vial.

A rexedora local mosense comunicou onte que o Concello iniciará de inmediato a redacción dun proxecto constructivo de actuación no Polígono do Rebullón mentres se busca a fórmula máis idónea de financiación para poder, deste modo, reducir tempos de actuación.

Así mesmo Arévalo declarou a “necesidade de revalorizar esta zona industrial, estratéxica pola súa ubicación, pero que precisa dunha mellora estructural importante e vital para a subsistencia do polígono”.