O Concello de Nigrán recupera para a décima edición do Nigranjazz o xa tradicional concurso de carteis 'Quin Alborés', para o cal está aberto o prazo de presentación de propostas ata o 10 de xuño ás 10.00 horas. O traballo gañador, premiado con 500 euros, será o que se empregue para a difusión do festival. Este certame rende homenaxe dende o ano 2010 ao artista nigranés Quin Alborés, gran amante do jazz e quen impulsou o Festival dende o seu comezo deseñando os seus tres primeiros carteis.

O concurso está aberto a persoas físicas ou xurídicas de Galicia maiores de 18 anos, podendo presentar cada unha delas un máximo de dúas obras, coa condición indispensable de ser inéditas e relativas ao mundo do jazz. Os orixinais realizaranse en formato vertical, en tamaño A2, e serán enviadas por mail.

Os interesados deben prestar especial atención a todas aquelas indicacións que veñen recollidas nas bases (modo de envío, formatos, texto...).