Un total de 135 alumnos e alumnas mosenses de 5º e 6º cursos de Educación Primaria visitaron entre o pasado mércores e esta mañá o Festival de Cans. Hoxe visitaron o festival os nenos e nenas dos colexios Pena de Francia e Mestre Valverde Maio de Sanguiñeda (un total de 95), que tiveron a sorte de charlar con David Machado, Premio Goya ó mellor sonido pola película ‘El desconocido’, de Dani de la Torre; e incluso puideron ver o Goya moi de preto e telo nas súas mans, polo que se amosaron moi emocionados.

Dende a concellería de Educación e Participación Cidadá do Concello de Mos, promotora e organizadora desta actividade, quérese fomentar o coñecemento dos recursos culturais que hai no entorno e colaborar na difusión da cultura e da arte.

O Festival de Cans, celebrado anualmente no Concello veciño de O Porriño, é unha divertida cita alternativa e constitúe unha boa oportunidade para que os escolares coñezan iniciativas de ámbito local que repercuten non só no campo audiovisual, senón na promoción do uso da lingua galega, na cultura e na dinamización das parroquias e da vida da xente que as acolle.

Os obxectivos específicos desta iniciativa son dar a coñecer os recursos e as manifestacións culturais e artísticas do contorno, fomentar o espírito crítico entre os escolares, desenvolver nos alumnos/as as habilidades necesarias para apreciar e disfrutar coa arte e con outras manifestacións culturais, proporcionar un espazo de relación e comunicación diferente ao habitual, e dar a coñecer a gran labor da organización e dos veciños que colaboran de xeito altruísta.

A actividade consistiu nunha visita ao Festival de Cans, na que os alumnos/as puideron disfrutar das diferentes actividades que ofrece este evento,  ademais de coñecer as súas instalacións e ao persoal encargado da organización do mesmo.

Os colexios que foron ao Festival de Cans, súmandose a esta iniciativa municipal foron tres: CEIP Pena de Francia (81 escolares participantes), Mestre Valverde Maio de Sanguiñeda (19 escolares) e Atín (35 alumnos/as).