Hoxe celebráronse as fases finais por concentración do Campionato Galego de Fútbol Prebenxamín (categoría integrada por cativos de 6,7 e 8 anos de idade), disputadas no mosense Campo de Fútbol das Baloutas. Resultou vencedor o equipo da E.D. Val Miñor, acadando o título de subcampión o equipo anfitrión, a U.D. Mos. A entrega de trofeos e  medallas realizouse esta tarde ó remate da xornada no centro do campo, e o acto contou coa asistencia do presidente da Federación Galega de Fútbol, Rafael Louzán, da alcaldesa de Mos, Nidia Arévalo, o concelleiro de Deportes e tenente alcalde de Mos, Alberto Méndez, o tamén edil mosense, Luis Alonso; Enrique González, delegado da Federación Galega de Fútbol en Vigo, Fernando Iglesias, vogal da Xunta Directiva da Federación Galega de Fútbol, e Pablo Serodio, presidente da Unión Deportiva Mos.

O terceiro posto da clasificación foi para as ‘Escuelas de Fútbol Portero 2000’, o cuarto posto para E.D. Ourense, o quinto para A.D. Vila do Corpus, o sexto para o Sárdoma C.F., o sétimo para C.D. Beluso e o oitavo para E.F. Cangas.

A fase final do campionato, organizada pola Unión Deportiva Mos, celebrouse ó longo da xornada de hoxe en horario de mañá: de 10.30 horas a 14.00 horas e de tarde de 17.00 horas a 19.00 horas (pola tarde disputáronse as fases de consolación, semifinais, final, final de consolación e realizouse, como xa se dixo, a entrega de medallas e trofeos).

O Campo de Fútbol das Baloutas é a sede da Zona Sur Grupo B do Campionato Galego e hoxe xogaron nel as fases finais un total de 8 equipos, 4 do Grupo A e outros 4 do Grupo B. Do Grupo A estiveron o E.F. Portero 2000, A.D. Vila do Corpus, C.D. Beluso e U.D. Mos. E do Grupo B foron os equipos E.D. Val Miñor, E.D. Ourense, Sárdoma C.F. e E.F. Cangas.

Habilitáronse no campo dous terreos de xogo e en cada un deles disputáronse 6 partidos, sumando un total de 12 encontros. Cada partido dividiuse en dous tempos de 15 minutos de duración cada tempo e de 3 a 5 minutos de descanso entre ambos.

O sistema de competición foi o seguinte: clasificáronse os dous primeiros de cada grupo para a fase final (postos do 1º ó 4º) e os clasificados nos postos 3º e 4º de cada grupo disputaron a fase de consolación (postos do 5º ó 8º). O vencedor desta fase, A.D. Val Miñor, disputará a Fase Final Galega.

Sobre este evento deportivo a alcaldesa declarou que “é unha honra para nós que o municipio de Mos sexa a sede da final do Campionato Galego Prebenxamín e agradecémoslle á Federación Galega de Fútbol, Á Xunta de Galicia, e a Deporte Galego a súa implicación coa mesma”. Ademais a rexedora local mosense quixo “darlle as gracias moi especialmente á anfitriona Unión Deportiva Mos e ó seu presidente, Pablo Serodio, polo arduo traballo de organización destas fases finais por concentración; así como polo intenso labor a prol do deporte en xeral e do fútbol en particular en todas as categorías e ó longo de todo o ano”.

Pola súa banda o edil de Deportes e tenente alcalde de Mos, Alberto Méndez, explicou “a importancia do deporte base e por suposto do fútbol base para educar dende as categorías inferiores nos hábitos de vida saudables, a capacidade de superación, o compañeirismo, o espíritu de equipo, o respecto polo rival e a competición sá e limpa”. E concluiu argumentando que “eventos deportivos coma esta final son o mellor xeito de poñer en práctica todos estes valores, fundamentais na sociedade actual e nos que é vital educar ós nosos/as nenos/as e mozos/as”.