A presidenta da Deputación de Pontevedra, Carmela Silva, e o alcalde de Fornelos de Montes, Emiliano Lage, asinaron esta mañá o convenio para a concesión dun crédito de 49.500 euros para operacións de tesourería neste municipio. Trátase dun dos concellos beneficiados pola convocatoria do Goberno provincial de préstamos sen xuros para os concellos de menos de 50.000 habitantes para o financiamento de inversións, operacións de tesourería, necesidades urxentes ou desfases transitorios.

O alcalde mostrou o se agradecemento á Presidenta pola concesión desta liña de crédito pero, sobre todo, porque sexa sen ningún tipo de xuro o que redunda nun dobre beneficio para o concello ao garantir a liquidez sen coste engadido.

Pola súa parte, Carmela Silva recordou que a Deputación é a casa de todos os concellos e a aposta por préstamos sen xuros é unha resposta obrigada da institución provincial dada a situación delicada da tesourería de moitos concellos.

En 2016 é a primeira vez que a Deputación provincial saca esta liña de créditos en réxime de  concorrencia competitiva e sen ningún tipo de xuros para os municipios, xa que co anterior Goberno estes eran do 2%. Ademais de Fornelos de Montes, outros seis concellos -Catoira, Silleda, Poio, Pazos de Borbén, A Cañiza e Salceda de Caselas- se benefician desta iniciativa, na que o ente provincial inviste 1.137.708,7 €.
Ademais, na Xunta de Goberno do pasado venres aprobouse unha segunda convocatoria para a concesión deste tipo de préstamos a concellos, por valor de 362.291,28 €. Faise así porque na convocatoria inicial non se esgotou o importe máximo asignado a esta iniciativa, que era de 1,5 millóns de euros, o que supón tamén 500.000 € máis que a última asignación do anterior Goberno provincial.