O Pavillón Municipal do Porriño acolleu a segunda xornada da Liga Galega de Baloncesto organizada pola Federación Galega de Deporte Adaptado (FGDA), na que participaron máis dun cento de xogadoras e xogadores integrantes dos equipos de Aceesca, Asdan, Aspanaex, Aspavi, Esclavas V.D., Juan XIII, Méndez Núñez, Prioriño, Saiar, San Rafael e San Xerome.

Á competición, que se disputou en forma de liga de 10 e media da mañá a 2 da tarde deste mércores, día 24, asistiron a concelleira de Educación, Lourdes Moure, e o concelleiro de Deportes, Manuel Carrera, coma na primeira xornada, disputada o pasada mes de marzo. O campionato concluirá en outubro, mes no que os quintetos se medirán na terceira e última xornada.

Manuel Carrera salientou o “magnífico traballo” que levan a diante adestradores, directivos e, “especialmente, os deportistas” que contenden a este campionato e, logo de felicitarlles pola seu esforzo, reiterou que o Concello do Porriño quere que a vila sexa a sede permanente desta liga polo cal asinará un acordo coa Federación Galega de Deporte Adaptado (FGDA) para que este desexo sexa unha realidade e os mellores xogadores galegos da categoría se dean cita cada ano no Porriño.