Onte a tarde celebrouse no salón de sesións do Concello de Mos un acto de recepción ó equipo da Unión Deportiva Mos, polo seu recente ascenso a Primeira Rexional ó erixirse campión da actual tempada 2015-2016. O acto celebrouse  ás 20.00 horas e contou coa asistencia da alcaldesa de Mos, Nidia Arévalo, o concelleiro de Deportes e tenente alcalde de Mos, Alberto Méndez, o tamén edil mosense Luis Alonso, Pablo Serodio, presidente da Unión Deportiva Mos e os xogadores e equipo técnico da U.D. Mos.

O título de liga decidiuse na derradeira xornada disputada o pasado domingo 22 de maio nun encontro trepidante por tratarse do derbi mosense no que se enfrontraban no Campo de Fútbol das Baloutas a U.D. Mos e o Club Louro-Tameiga. Para erixirse campións da tempada 2015-2016, á U.D. Mos valíalle cun empate, e finalmente logrou manter o marcador a ceros acadando o título de campión de liga e ascendendo á categoría de Primeira Rexional.

A rexedora local mosense agradeceulle á diretiva do clube o xeito no que o administra, pola súa responsabilidade e eficacia, “facendo un traballo encomiable”, dixo. Ademais Arévalo destacou a importancia do deporte en xeral, e non só do fútbol, para fomentar o enriquecemento en valores e os hábitos de vida saudables.

Rematou a alcaldesa dándolles a noraboa a tódolos xogadores e técnicos responsables da victoria do Mos e animándoos a traballar duro para manterse en Primeira Rexional e, incluso, chegar a subir a Preferente aplicando un pouco máis de esforzo.