Segundo os datos publicados no día de hoxe polo Instituto Nacional de Estatística (INE), no primeiro cuadrimestre do ano, Galicia superou a cifra dos 920.000 viaxeiros, o que supón un incremento do 8,2% con respecto ao mesmo período do pasado ano. O número de pernoitas incrementouse tamén, nun 8,0% neste caso, acadando a nosa comunidade preto de 1,7 millón no conxunto da comunidade.

Estes incrementos permitiron que a nosa comunidade acadase o nivel máis elevado de pernoitas dende o 2010 nos catro primeiros meses do ano e a cifra de viaxeiros máis elevada dende o 2008 neste primeiro cuadrimestre.

A nivel estatal observouse tamén unha mellora dos niveis de demanda. En concreto a cifra de viaxeiros aloxados subiu un 10,0% mentres que as pernoitas incrementáronse un 9,8%.

A nosa comunidade acadou o nivel máis elevado de pernoitas e a cifra de viaxeiros máis elevada rexistrada neste período dende o 2010 e 2008 respectivamente

Os dous principais segmentos de mercado mantiveron unha tendencia positiva, subindo o turismo nacional, un 8,3% no tocante as pernoitas e un 8,6% no que atinxe aos viaxeiros. Con estes incrementos, o mercado nacional supera por vez primeira desde o 2010 o nivel dos 700.000 viaxeiros e a cifra máis elevada de pernoitas dos últimos seis anos.

Pola súa parte, o turismo internacional incrementou nun 6,8% a súa cifra de viaxeiros aloxados e nun 6,6% o nivel de pernoitas do primeiro cuadrimestre de 2015. Estre crecemento sitúa o nivel de pernoitas deste ano no máis elevado dos últimos oito anos e a cifra de viaxeiros nun máximo histórico acadando o peso deste segmento de mercado o 18,1% do total da demanda turística regrada.

Tipoloxías de aloxamento
Neste primeiro cuadrimestre de 2016, o 91,8% da demanda turística regrada correspondeu aos establecementos hoteleiros porcentaxe que inclúe tanto aos hoteis –que representaron o 74,6%- como ás pensións –co 17,2% neste caso-.

Nestes primeiros catros meses do ano, os apartamentos turísticos galegos incrementaron a súas pernoitas nun 53% e a súa cifra de viaxeiros nun 58%

O 8,2% restante, situouse no segmento extrahoteleiro, porcentaxe que reúne aos apartamentos turísticos –que representaron o 4,1% da demanda total-, aos establecementos de turismo rural –que supuxeron o 3,3% neste caso- e aos cámpings -que representaron o 1% do total da demanda regrada-.

Nestes primeiros catros meses do ano, destaca o crecemento rexistrado polos apartamentos turísticos galegos que incrementaron a súas pernoitas nun 53% e a súa cifra de viaxeiros nun 58%.