O ciclista guardés Aser Estévez, que conseguiu o pasado 17 de maio o seu noveno título no Campionato Galego de Contrarreloxo Individual na categoría Élite, acudiu esta semana a unha recepción no edificio do Concello da Guarda.

 
Alí foi recibido polo Alcalde da Guarda, Antonio Lomba Baz, e polo Concelleiro de Deportes,Manuel Javier Crespo González, cos que mantivo unha distendida reunión na que lle transmitiron as súas felicitacións e recoñecemento polos recentes éxitos acadados.

Ademais, tras falar dos próximos retos, dificultades e oportunidades que se presentan no futuro do deportista guardés, fixéronlle entrega dunha figura conmemorativa do Camiño Portugués da Costa e dun libro sobre a Historia da localidade.
 

Pero o líder do Club Ciclista Rías Baixas non para e tras esta visita, tal e como comentou na recepción ó alcalde e ó concelleiro, ten dúas datas sinaladas no seu calendario nas próximas semanas: o Campionato Galego de Fondo en Estrada e o Campionato de España.

 
Dende o Concello deséxanllea mellor das sortes nestas datas e nas que virán e que siga a acadar os maiores éxitos posibles e a levar o nome da Guarda por toda a Península.