A alcaldesa de Mos, Nidia Arévalo, e a concelleira de Medio Ambiente mosense, Julia Loureiro, informaron da concesión a esta administración local da subvención da segunda fase do Parque Lúdico-Didáctico da Auga en Sanguiñeda. A axuda da Xunta de Galicia  con cargo ao Fondo de Compensación Ambiental ascende a 32.000 euros, segundo explicaron as representantes municipais.

A continuación o Concello de Mos procederá a iniciar o proceso de licitación para a contratación da empresa que realizará a obra que se prevé estea rematada durante este verán.

“Nesta segunda fase”, declarou Loureiro, “crearase un novo espazo recreativo para o aprendizaxe da viaxe natural da auga en Sanguiñeda”. Para elo resérvase unha superficie de 15,5 metros por 7,30 metros na que se instalarán diferentes elementos, que se suman ós xa existentes, e que representan o ciclo hídrico con traxectos alternativos de cursos de auga cos que os nenos aprenderán xogando.

Deste xeito, no extremo oeste, haberá unha cascada que alimente un embalse cunha comporta manual dende a que a auga poderá pasar a un río central cheo de obstáculos ou, polo contrario, ser evacuada a dous ríos afluentes de menor tamaño con divertidos circuítos alternativos regulados por comportas de paso que os cativos poden manipular. Un chorro de auga vertical con forma de paraugas no centro do parque representará as choivas torrenciais coma as que en ocasións provocan o desbordamento do mosense río Louro. O final do traxecto dos cursos fluviais desembocará no mar, que será representado cunha poza no extremo leste onde se recollerá e evacuará a auga para a súa posterior reutilización, unha vez depurada.

“En definitiva, trátase de continuar ampliando o Parque da Auga de Sanguiñeda que ten un claro contido didáctico e lúdico, no que os máis pequenos poden aprender xogando, coñecer os fenómenos fluviais de desbordamento de ríos, os fenómenos hidráulicos dos embalses e as presas, as comportas e os elementos que permiten conducir a auga por traxectos distintos, a forza da auga nas cascadas naturais ou a enerxía hidráulica que move muíños”, dixo a edil Julia Loureiro.

A concelleira aproveitou tamén o anuncio desta boa nova da concesión desta subvención para anunciar a reapertura, con motivo do inicio da tempada estival e coincidindo coas Festas da Rosa 2016, da primeira fase do Parque da Auga. Comezará a funcionar de novo o vindeiro sábado 11 de xuño e durante este mes estará activo en horario de tarde, mentres que durante os meses de xullo e agosto funcionará pola mañá e pola tarde.

Por último, Loureiro concluiu manifestando a súa “satisfacción ante o feito de que a segunda fase do Parque da Auga sexa unha realidade, xa que a primeira foi todo un éxito de afluencia de público, o que motivou a intención municipal de continuar proxectando ampliacións. A primeira desas ampliacións é xa un feito e esperamos que esta iniciativa mosense pioneira se convirta nun referente na comarca e incluso na provincia. Polo de agora xa temos unha excursión escolar programada procedente dende A Lama para os próximos días, e o ano pasado foron moitos os escolares e familias de particulares procedentes de toda Pontevedra os que se achegaron a disfrutar deste entorno lúdico-didáctico do que dispomos no Concello de Mos”.